tomo kiwen suli

 

tenpo pini la tomo kiwen suli li lon sewi nena suli.

jan li toki e ni: “tenpo pini la jan sewi li pali e tomo kiwen suli li lon ona. jan sewi li lawa e ale lon ma. tenpo ona la ale li pona. jan li utala ala. soweli suli li moku ala e soweli lili. waso li moku ala e pipi. kala li tawa pona lon telo.”

tenpo pona.

ale li pona tan lawa pi jan sewi.

tenpo suno wan la jan sewi li tawa weka.

tenpo ni la jan li ken ala lukin e tomo kiwen suli.

ale li kama ante.

ale li utala.

ale li kama ike.

jan sona li toki e ni: “jan o! jan sewi li pilin ike tan sina. o anpa e sijelo. o awen toki tawa sewi.”

jan lili li awen sona e ni: ‘jan sewi li pilin ike tan seme? jan sona li toki ala e ni tan seme?’

ona li tawa jan sona li toki e ni: “tan seme? jan sewi li pilin ike tan seme?”

jan sona li pali ike sinpin lawa.

ona li toki e ni: “jan li ken ala sona e sona pi jan sewi. jan sewi li lon sewi pi sona mi mute. jan lili o awen toki tawa sewi taso.”

jan lili li ken ala alasa e ni.

ona li awen sona e ni: ‘jan sona li ken ala toki la mi wile tawa jan sewi li alasa e toki ona.’

jan lili li tawa weka.

ona li tawa ma ale.

ona li tawa ma pi soweli lili.

ona li tawa ma pi soweli tawa.

ona li tawa ma pi soweli kiwen.

ona li tawa ma pi soweli telo.

ona li ken ala lukin e jan sewi.

ona li kama suli lon tenpo ni.

ona li kama tawa nena kiwen.

ona li pilin ike tan tawa mute.

ona li lape lon nena kiwen.

ona li kama lukin e jan sewi lon lape.

ona li toki e ni tawa jan sewi: “jan sewi. sina weka tan seme? sina pilin ike tan seme?”

jan sewi li toki e ni: “mi weka tan ala. mi pilin ala ike. mi wile tawa ante li tawa weka.”

jan lili (tenpo ni la suli)li toki e ni: “sina lawa e mi mute. tenpo sina li weka la jan li kama utala. tenpo sina li weka la soweli li kama moku e soweli ante. tenpo sina li weka la waso li kama moku e pipi. tenpo sina li weka la kala li tawa pona ala lon telo. sina ike e ale.”

jan sewi li toki e ni: “mi ken ala sona e toki sina. mi lawa e sina tan seme? mi lon taso. mi pali ala. mi toki ala. sina taso anpa e lawa sina tawa mi. sina taso li pali tan pilin sina. sina kama ike li sina ike kin. ni li kama ala tan mi.”

jan lili li kama sona e ni: jan li sona e ala. jan sewi li lon taso. jan sewi li toki ala. 

jan sewi li pali ala. jan taso li wile sona e jan sewi. jan taso li wile anpa e lawa tawa jan sewi.

ona li kama jo e sona suli.

jan sewi li sona ni.

ona li toki e ni: “sina jo e sona sin. sina sin. sona sin sina li ante tan sona mi. sina jan sona sin. o tawa jan. o toki e sona sin tawa ona. taso o pilin ike ala. jan li ante ante.”

jan sewi li tawa weka lon lape.

jan lili li kama tan lape.

tenpo ni la jana lili li kama jan sona sin.

ona li tawa ma ona li pana e sona sin tawa jan ona.

jan ona li pilin ike.

ona li alasa ala e sona sin.

ona li olin e sona pini.

jan sona sin li pilin ike li tawa nena kiwen.

ona li pali e tomo kiwen lili.

ona li pali ala lon tomo kiwen lili.

ni la jan li pilin pona li kute e sona sin.

jan pi ma ale li kama tawa jan sona sin.

jan sona sin li kama jan sewi sin tawa jan. 

jan li pali e tomo kiwen suli tawa jan sona sin.

jan sona sin li ala lon tomo kiwen suli. 

taso jan li anpa e lawa lon sinpin pi tomo kiwen suli.

jan li kama ala ante li sike e ale.