moku sewi

jan mute li toki e ni: “tenpo pini la jan sewi li kama tan kon sewi li pana e moku. moku ni li pana e wawa tawa jan. jan wan li moku e ni li kama jan wawa. ona li kama jan lawa pi jan mute.”

jan mute li alasa e moku ona lon tenpo mute.

ante la ona li jo ala e moku ona.

tenpo suno wan la jan wan li tawa nena pimeja suli.

ona li kute e ni: “jan sewi li pimeja. ona li tawa ala sewi. ona li kama nena pimeja suli lon ma. jan li ken jo e moku sewi lon nena pimeja suli!”

jan li alasa lon nena pimaja ale.

ante la ona li ken ala lukin e moku sewi.

ona li pilin ike li jo ala e wawa.

ona li tawa anpa pi nena pimeja li kama lape.

tenpo li pini la ona li pini lape.

ona li lukin e poka ale.

ona li lukin e lupa.

ona li tawa insa lupa.

ona li lon insa la ona li lukin e kili pimeja.

kili li pimeja kin li jo e suno.

ona li moku e kili.

ona li pilin ike.

ante la ona li kama pona.

ona li pilin wawa lon insa ona.

ona li weka tan nena pimeja li tawa ma tomo.

ona li moli e jan lawa pi ma tomo li kama jan lawa.

ona li lawa e ma tomo kepeken wawa.

jan mute pi ma tomo li pilin ike.

jan li toki ni tawa sewi: “sewi o weka e wawa tan jan lawa. sewi o moli e jan lawa!”

tenpo ni la kalama wawa li kama tan nena pimeja.

jan mute li lukin e nena pimeja.

seli suli li kama tan sewi pi nena pimeja suli.

seli li tawa ale, li kama tawa ma tomo, li pakala e ma tomo.

seli li moli e jan lawa, li moli e jan pi ma tomo.

sewi li kute e toki jan ona mute.

jan li wile e moli pi jan ante la jan li wile e moli ona.

pini la ala li lon.

tenpo ni la kasi pimeja kama tan ma.

kili pimeja li kama tan kasi pimeja.