jan sona suli pi nena kiwen suli

tenpo pini la jan sona suli li lon nena kiwen suli.

jan mute li olin e ona li lukin sewi e ona.

jan mute ante li pilin ike tan ona li toki e ike tawa ona.

ona li toki e ala tawa jan pona en jan ike.

ona li sewi e pini uta taso.

tenpo suno wan la jan li kama li toki e ni: “mi pilin ike tan ale mi. mi jo ala e mani. mi jo ala e jan olin. mi jo ala e wawa. mi ken e seme?”

jan sona suli li toki e ala.

ona li sewi e pini uta taso.

ni la jan li pilin pona.

jan li weka lon pilin pona.

tenpo ante la jan ante li kama li toki e ni: “mi pilin ike tan ale mi. mi jo e ale. mi jo e mani mute. mi jo e jan olin. mi jo e wawa. ante la ale li pana ala e pona tawa mi. mi ken e seme?”

jan sona suli li toki e ala.

ona li anpa e telo oko taso.

ni la jan li pilin pona.

jan li weka lon pilin pona.

jan wan li lukin e ni li toki e ni tawa jan sona suli: “sina toki e ala li sewi e pini uta anu li anpa e telo oko. jan li pilin pona tan seme?”

jan sona suli li toki e ala.

ona li lukin e jan taso.

ni li pana e sona suli tawa jan. 

ona li anpa e lawa tawa jan sona suli li tawa anpa nena.

jan sona suli li lon sewi nena taso.