jan Okowan en meli lete
ona li alasa e soweli walo suli.
selo pi soweli walo suli li wile pana e mani mute tawa ona.
tenpo suno mute li pini la, ona li lukin e soweli walo suli.
ona li utala e soweli walo suli.
soweli walo suli li pakala li weka tan ona.
ona li lukin e telo loje lon ma walo.
jan Okowan li ken alasa e soweli.
sowlei walo suli li lon monsi kiwen suli.
jan Okowan li utala sin e soweli.
soweli li mu li moli.
jan Okowan li pali e moku e selo tan soweli.
tenpo ni la, jan walo li kama tawa monsi jan Okowan.
jan Okowan li sona ala ni.
jan walo li sewi e luka li pali e palisa lete lon kon.
ona li pana e ni tawa jan Okowan.
jan Okowan li kute e kalama li tawa poka.
ona li lukin e jan walo.
jan walo li meli.
kon walo lete li kama tan ona.
jan Okowan li toki e ni: “sina utala e mi tan seme?”
meli lete li toki e ni: “sina moli e soweli mi lon ma mi. sina wile moli!”
jan Okowan li toki e ni: “taso mi alasa e soweli ni tan ma seli. ma seli li ma sina ala. sina ken ala moli e mi.”
meli lete li toki ala lon tenpo lili.
ona li toki e ni: “o toki ala e ijo nasa! mi wile la, mi ken jo!”
tenpo ni la, meli lete li utala e jan Okowan kepeken palisa lete.
jan Okowan li sewi e ilo moli pi selo akesi li pakala e palisa lete.
ilo moli pi selo akesi li jo seli lon insa.
ona li ken pakala lete.
jan Okowan li tu e luka meli lete.
meli lete li pana e telo loje tawa ma.
ona l toki e ni: “sina jan utala wawa. mi utala e sina li ken ala pakala e sina. o moli e mi.”
jan Okowan li toki e ni: “sina wile moli e mi tan seme? mi wile sona e ni.”
tenpo lili li pini la, meli lete li toki e ni: “jan lili mute li lon monsi nena walo suli. ona li moku ala lon tenpo suno mute. mi wile pana e moku tawa ona.”
jan Okowan li ike pilin.
ona li sike li tawa soweli walo suli moli.
ona li sewi e moku tan soweli li tawa meli lete.
ona li pana e moku tawa meli lete.
ona li toki e ni: “o jo e moku. o pana e ni tawa jan lili mute. mi wile jo e selo taso. mi wile mani.”
ona li sike li sewi e selo.
ona li weka.
meli lete li lukin e ona lon tenpo mute.
kon tawa li lon ma ale.
suno li anpa tawa ma.
ona li ken ala lukin e jan Okowan.
Comments
Post a Comment