lipu pi jan Jono

  pimeja li lon ale. mi lukin e ala. kalama ala li lon. mi kute e ala. ijo suli li lon pimeja. ona li pali ala e kalama. mi ken ala lukin e ona. mi ken ala kute e ona. ona li jo e kasi pimeja suli lon sewi lawa ona. luka kasi li tawa kon sewi. mi ken ala lukin e ona. mi ken ala kute e ona. waso pimeja li kama tawa kasi. waso li anpa tawa luka kasi li mu. mi ken ala lukin e ona. taso mi ken kute e ona. ijo suli li sewi oko li lukin e waso. waso li pini e mu. mi ken kute e ala.

suno li sike. mun li sike. ma li sike. sike li pona lukin. suno li tawa sike. mun li tawa sike. ma li tawa sike. sike li pona lukin. sike li pali e tenpo. suno li kama la mun li tawa. mun li kama la suno li tawa. ni li tenpo. tenpo li tawa sike. tenpo li sike.

  soweli li lape lon kasi. suno li lon sewi. suno li pana e seli tawa soweli. soweli li lukin e suno. ona li jo ala e pali. ona li lape. ale li pona. suno li tawa anpa ma. tenpo pimeja li kama. soweli li alasa e moku. ona li moku. ona li jo ala e pali. ni li pona tawa ona. ona li tawa kasi li lape. kalama ala li lon pimeja. ale li pona.

kasi lili mute li lon ma laso jelo. kon pona li kama tan ma kasi laso jelo. jan li alasa e lipu pi kasi lili. jan li seli e lipu kasi. jan li seli e telo. jan li pana e lipu kasi tawa telo seli. tenpo kama la, telo seli li kama laso jelo. kon pona li kama tan telo laso jelo. ni li kon laso jelo anu seme?

jan li seli e kili pimeja. jan li pakala e ni. jan li pana e ni insa telo seli. jan li ken jo e telo pimeja. jan li pana e moku tawa soweli. soweli li jo e soweli lili. soweli li pana e telo walo tawa soweli lili. jan li kama jo e telo wlao tan soweli. ni la, jan li jo e telo pimeja e telo walo. jan li pana e tu tawa poki. piki pi telo pimeja walo. pona tu li kama pona wan. mi mute o moku! (taso kule ni li pimeja walo anu seme?)

  lipu suli li toki e ni: nimi li lon. ni la nimi li jo e wawa. jan li sona e nimi sina la ona li ken jo e sina. o pana ala e nimi sina tawa jan ante. jan sona li pana ala e nimi. ona li pali e nimi ante li pana e ni. sina o pana ala e nimi sina tawa jan ante. sina pana e nimi la sina pali e nimi ante li pana e ni. nimi ni li ala lon li jo e wawa. jan ike li lon ma ale li wle utala e sina. o awen e sina tan ike.

mani li suli. jan li esun e moku kepeken mani. jan li esun e tomo kepeken mani. jan li esun e len kepeken mani. jan li esun e tenpo kepeken mani. jan li esun e olin kepeken mani. mani li esun e mute. jan li toki e ni la ona li toki ala lon: “mani li suli ala.” taso mi wile ala alasa e mani. kepeken nasin seme? jan mute li toki e nasin mute. taso nasin mute ni li lon ala. ni la mi wile kepeken e mani. mi wile moku e pan kepeken mani. mi wile tawa lon tomo tawa kepeken mani. mi wile esun e len sewi kepeken mani. mi wile pali li wile alasa e mani. a a a. tawa tenpo seme?

kon tawa li pali e kamala lon ma kasi. taso kon tawa li weka la kamala kin li weka. waso li pali e pimeja lon supa telo. taso waso li weka la pimeja kin li weka. jan sona li pali la ona li pali taso. taso pali li pini la jan sona li weka tan pali.

ma Jeju li ma lon telo pi ma Anku. ona li pona lukin li seli. jan mute li tawa ona li pona e pilin. tenpo pini la jan li toki e ni: “ma Jeju li jo e kon tawa mute. ma Jeju li jo e kiwen nute. ma Jeju li jo e meli mute.” tomo pi ma Jeju li lili tan kon tawa mute. nena seli li pali e kiwen mute. meli mute pi ma Jeju li wawa. sina ken lukin e ijo pona lon ma Jeju. sina li kama Anku la o tawa ma Jeju. mi kin wile tawa ma Jeju.

  mi kute e kalama musi li tawa. mi tawa lon tenpo pimeja. mi sewi lon nena. mi tawa mute poka telo tawa. tenpo ale ni la len noka li suli. len noka pona li pana ala e pilin ike tawa noka. mi olin e tawa. taso mi olin e lape kin. tenpo mi lape la mi wile ala e len noka. len noka li suli ala suli tawa mi? mu ・・・

mi lon tomo. tenpo mute la mi kute e kalama musi. ilo kalama musi mi li ilo toki. taso ilo toki li pona ala. tenpo ni la ilo toki li pali e mute. toki. lukin. sitelen. kute. mi kute e kalama musi la mi wile kute e kalama musi taso. ni la mi alasa e ilo kalama musi. ona li ken pana e kalama musi taso. toki ala. lukin ala. sitelen ala. kute taso. seme li sona e ilo kalama musi pona?

pan linja li pona. moku li pini la mi mute li wile tawa tomo. taso meli mi li toki e ni: “mi mute li wile ala wile tawa lon ma tomo?” ni li pona tawa mi. moku li pini la tawa li pona tawa sijelo. mi toki e ni: “pona! mi mute o tawa.” suno li tawa anpa ma. tenpo pimeja li kama. mi mute li tawa lon tenpo pimeja. mi mute li pilin pona. kon li lete li pona. mun li kama sewi tan ma. seli pi ma tomo li kama tawa pimeja. ni li pona lukin. kamala pipi li kama tan kasi poka nasin. ale li pona lukin. ale li pona tawa kute.

  mi weka tan ma kasi. mi wile moku! mi moku e seme? mi toki tawa meli mi kepeken ilo toki. mi toki e ni: “o kama! mi mute o moku lon tomo moku pona!” meli mi li toki e ni: “pona. mi wile pan linja.” pan linja! mi olin e pan linja. mi toki e ni: “pona. o kama tawa tomo moku pi pan linja pimeja.” meli mi li toki e ni: “ike. mi wile pan linja pi ma Italija.” mu! ni la mi wile ala e pan linja pi ma Italija. taso meli mi li lawa pi tomo mi. tenpo suno ni la mi mute li moku e pan linja pi ma Italija.

  pali li pini la mi pilin ike. mi wile tawa weka tomo. mi tawa ma kasi. ma kasi lili li lon poka ma tomo mi. mi kute e waso. mi lukin e kasi kule. mi lukin e soweli lili sewi kasi suli. suno li ken ala kama insa ma kasi. pimeja pi kasi suli li lon ma kasi ale. ona li lete e ma kasi. mi awen anpa kasi suli li awen sona ala. mi pilin taso. mi pilin e lete. mi pilin e kon tawa. mi pilin e soweli. mi pilin e waso. mi pilin e mi. mi pilin pona. ma kasi li pona e mi.

mi pini e pan lupa suwi e telo pimeja. meli mi li weka e poki moku tawa tomo pi pali moku. mi wile pali lon tomo lipu. mi tawa tomo lipu. ante la mi kama sona e ni: mi jo ala e ilo oko. mi weka tan tomo lipu li toki e ni tawa meli mi: “sina lukin ala lukin e ilo oko mi?” ona li lukin e mi li mu musi. ona li sewi e luka tawa mi li toki e ni: “sina jo e seme lon sewi pi lawa sina?” mi sewi e luka tawa lawa mi. ilo oko mi li lon sewi pi lawa mi. mi kama sona e ni: ante tenpo suno kin la mi alasa e ilo oko li kama jo e ona tan lawa mi. mi ike musi nasa ・・・

  meli mi li toki e ni: “sina tawa ala tawa esun?” mi toki e ni: “tawa. sina wile e seme?” ona li toki e ni: “o esun e pan lupa tawa mi.” mi toki e ni: “pona. mi wile.” mi tawa esun pan. mi esun e pan lupa. mi tawa esun telo pimeja. mi esun e poki tu pi telo pimeja. ni la mi tawa tomo mi. mi pana e pan lupa e poki wan pi telo pimeja tawa meli mi. ona li luklin e pan lupa li lukin e mi. ona li toki e ni: “mi wile e pan lupa. mi wile ala e pan lupa suwi.” mi sona ala e ni. mi toki e ni: “mi ike. ante la telo pimeja li wile pona e pan lupa suwi.” ona li moku e pan lupa suwi e telo pimeja. ni li pona tawa ona. tenpo ale la pan lupa suwi en telo pimeja li pona mute!

  suno li sewi tan anpa ma. mi sewi e sijelo tan supa. suno li kama tawa insa tomo mi. mi tawa tomo moku. mi seli e telo. mi pana e ko pimeja insa poki. mi pana e telo seli insa poki. telo seli li kama pimeja. telo pimeja. mi moku e telo pimeja. mi pilin pona. mi sona pona. mi pali pona. tenpo ni la mi ken jo e tenpo suno pona sin.